ಅವಳಾರು ...

ಅವಳಾರು ...

ಒಮ್ಮೆ ಕನಸಿನ ಬಾಗಿಲಲಿ
ಬೊಗಸೆ ದೀಪದ ಬೆಳಕಿನಲಿ
ನನಗಾಗಿ ಕೂತು ಕಾಯುವಳು
ನನ್ನದೇ ಖಯ್ಯಾಲಿಯಲಿ...

ಮತ್ತೊಮ್ಮೆ ಅದೇ
ಕನಸಿನ ಪರದೆ ಸರಸಿ
ಸರಸ ಸಾಮ್ರಾಜ್ಯದ ಅರಸಿಯ
ಪಾತ್ರಳಾಗುವಳು 

ಆಗೊಮ್ಮೆ ಈಗೊಮ್ಮೆ
ದಿನದ ಕಿಟಕಿಯೊಂದರ
ಬೆಳಕಿಗೆ ಅಡ್ಡಲಾಗಿ ಮುಂದೆ ನಿಂತು
ಜಡ ನಿದ್ದೆಯ ಷರತ್ತಿಗೆ ಅಡ್ಡಿ ಪಡಿಸುವಳು

ದಿನದ ಗಡಿಬಿಡಿಯಲಿ
ಹಾರಿ ಹೋದ ಬಾನಾಡಿಯವಳು 
ಒಂಟಿಯನಿಸುವ ಮುನ್ನವೇ
ಮತ್ತೆ ಗೂಡಿನ ಬಾಗಿಲು ತಟ್ಟುವಳು 

ಇಬ್ಬರು ಕಾಲಿಟ್ಟು ಕಟ್ಟಿದ 
ಮರಳು ಗೂಡಿನ ಮುಂದೆ
ಬೆರಳು ಅರಳಿಸಿದ
ನನ್ನೆದೆ ಗೂಡಿನ ಹಸಿ ಹೆಸರು ಅವಳು 

ಯವ್ವನದ ಹೊಸಿಲಲಿ ಕನಸುಗಳ
ಯುಗಾದಿಯಾಗಿ ಬಂದವಳು 
ಖುಷಿಗೆ ಖರ್ಚಿಲ್ಲದೆ 
ಕಣ್ಣಿಗೆಲ್ಲ ಹಬ್ಬದಂತಿಹಳು ... ನನ್ನವಳು ... 

ರುದ್ರಪ್ಪ...